[هيفولا]

سلطات صحيّة وسريعة التحضير




سلطة المكرونة

المقادير:

• كيس مكرونة
• 1/2 كوب لبن ساخن
• 1/4 كوب زيت زيتون
• 1/2 كوب جبنة رومي مبشورة
• مكعب جبنة كيري "اختياري"
• 1/2 كوب كزبرة مفرومة
• كوب بسلة مسلوقة
• 1/2 كوب بصل مفروم
• 1/2 كوب زيتون أخضر مقطّع قطع صغيرة
• 1/4 كوب فلفل ألوان
• ملح وفلفل

الطريقة:
1- اسلقي المكرونة وصفّيها من المية، وبعد كده حطّيها في حلة،
وضيفي ليها قطعة زبدة صغيرة، وقلّبيها على النار كويس جداً.

2- بعد كده حطّي اللبن، ومكعب جبنة كيري على النار،
وقلّبيهم مع بعض لغاية ما الجبنة تذوب تماماً،
وبعد كده ضيفي الملح والفلفل والكزبرة،
وممكن تعصري معاهم نصف ليمونة.

3- حطّي المكرونة في طبق التقديم، ومعاها الفلفل والزيتون والبسلة والبصل المفروم،
وقلّبيهم كلهم مع بعض كويس، وبعد كده ضيفي صوص اللبن والجبنة،
وبعد كده شيليها في الثلاجة.

4- وعند التقديم ممكن ترشّي على وشها جبنة رومي مبشورة..
وبالهنا والشفا.

*******************

سلطة التونة بالخضراوات

المقادير:

• 2 علبة تونة
• 2 حزمة كرفس مفروم
• 2 ثمرة طماطم مقطّعة قطع صغيرة
• كوب حمص مسلوق "اختياري"
• بصلة متوسّطة مفرومة
• 1/2 كوب زيتون أخضر مخلي
• حزمة بقدونس مفروم
• 1/4 كوب زيت زيتون
• عصير 2 ليمونة
• ملح وفلفل

الطريقة:

1- حطّي التونة في طبق التقديم،
وضيفي عليها: البقدونس، والبصل، والحمص، والكرفس،
والملح، والفلفل، والطماطم، والزيتون.

2- في طبق تاني اخلطي عصير الليمون مع زيت الزيتون،
وقلّبيهم كويس جداً، وبعد كده ضفيهم على سلطة التونة..
وبالهنا والشفا.

*******************

سلطة البطاطس

المقادير:

• 3 ثمرة بطاطس كبيرة
• 2 ملعقة كبيرة خل
• 3/4 كوب مايونيز
• بصل أخضر مقطّع قطع صغيرة (الفروع الخضراء)
• 3 ملاعق كبيرة مسطردة
• ملح وفلفل
• بصلة كبيرة مفرومة
• 2 بيضة مسلوقة

الطريقة:
1- اسلقي البطاطس، وبعد كده برّديها بالمية،
وقشّريها، وقطعيها لمكعبات صغيرة.

2- هاتي طبق صغير، وحطّي فيه المايونيز والمسطردة والخل والبصل،
وقلّبيهم كويس مع بعض، وبعد كده ضيفي الملح والفلفل
على حسب الطعم اللي إنتِ عايزاه.

3- قطّعي البيض لمكعبات، وحطي عليه شوية ملح وفلفل،
وبعد كده ضيفيه على البطاطس،
وضيفي معاه خليط المايونيز والمسطردة اللي حضّرتيه.

4- وفي النهاية ممكن تزيّني الطبق بقطع البصل الأخضر.. وبالهنا والشفا.

*******************

سلطة الفراخ بالمشروم
المقادير:

• 1/2 كيلو صدور فراخ مقطّعة قطع صغيرة
• زيت زيتون
• ملح وفلفل
• حزمة كرفس مفرومة
• ثمرة طماطم وقطّعيها مكعبات صغيرة
• 1/2 علبة مشروم
• حزمة خس

الطريقة:
1- بعد ما تتبلي الفراخ بالبصل والليمون، حطّيها على النار،
وحطّي عليها زيت الزيتون، وتابعيها لحد ما تستوي كويس.

2- بعد كده حطّي شوية زيت زيتون على النار،
وشوّحي فيها المشروم لمدة 3 دقائق.

3- بعد كده اخلطي قطع الفراخ مع المشروم،
وحطّيهم في طبق التقديم.

4- بعد كده ضيفي عليهم الخس والطماطم والملح والفلفل،
وقلّبيهم كلهم مع بعض كويس وقدّميها.. وبالهنا والشفا.

*******************

سلطة البسلة بالمايونيز
المقادير:

• 1/2كيلو بسلة مسلوقة
• بصلة كبيرة مقطّعة حلقات
• 3 ثمرات جزر مبشور
• 4 ملاعق كبيرة مايونيز
• ملح وفلفل
• 2 ملعقة كبيرة خل
• لوز مقشر "اختياري"
• 2 ملعقة كبيرة زيت زيتون

الطريقة:
1- اخلطي البسلة مع الملح والفلفل والجزر والبصل.

2- هاتي طبق صغير، واخلطي فيه المايونيز مع زيت الزيتون والخل،
وقلّبيهم كويس جداً، وبعد كده حطّي الخليط ده على البسلة
وزيّني الطبق باللوز..
وبالهنا والشفا

منقووووول


هيفولا