[هيفولا]

الجمبرى بصوص الزبدة والصويا

وعشان نتفق من اولها نشوف الصورة التعذيبية

زى ما عودتكم كل مرة ممكن تلاقوا حاجات ضيفتها وانا بشتغل
او حاجات صورتها وما استعملتهاش لانى بطبخ بمزاجى
ومش بلتزم بوصفة لانها غالبا بتكون اختراع وخلاص

المكونات

طبعا جمبرى , وزبدة وصويا صوص
هوت صوص , نشا , جنزبيل فريش او بودرة
توم , مشروم , فلفل رومى او حار ,
جزر .. اللى موجود وخلاص

هنقشى الجمبرى زى الصورة لغاية اخر حتة جمب الديل نسيبها ..
دى بتحميه انه يكش وشكله بيكون حلو ,
ونشيل الخيط فى الضهر
**
تكة مهمة جدا
عشان الجمبرى يفضل طرى وهو بيستوى اننا مش بنقرب منه المية
طول فترة تقشيره وتنضيفه وبعدين نغسله مرتين لحد ما ميته تروق ونصيفيه على طول ,
لانه كل ما يقعد فى المية يبقى عامل زى المطاط وناشف ..
وزيه بالظبط مع المشروم اكيد
**
نحط طاسه غويطة على النار وفيها الزبدة تسيح
نحط التوم مفروم ومعاه الجنزبيل شرايح او مفروم بردو والفلفل الحار
لحد ما يصفروا
ننزل عليهم بالجمبرى ونقلب
**
قطعت جزر شرايح وفلفل رومى وضيفتهم يستووا معاهم
وفى الاخر ضيفت المشروم بعد 5 دقايق
عشان مش بياخد وقت طويل فى السوى

الطبخة كلها ما اخدتش غير 20 دقيقة على النار
لان الجمبرى ما بياخد وقت والخضار اللى معاه كان فريش ومش مهرى

فى الاخر تبلت بفلفل اسود ورشة كمون صغيرة
و No ملح لان الصويا صوص ملحها كفاية

دوبت معلقة نشا فى نص كوب صويا صوص
وضيفتهم فى الاخر خالص لحد ما عملى صوص تقيل
بس نصيحة منى لو الطبخة ما نزلتش مية يبقى خليها تبقى نص كوب صويا
ونص كوب مية باردة عشان الصوص يبقى اكتر
لان السوائل كانت قليلة عندى لانه الخضار كان فريش اوى
ومانزلش مية كتير واضطريت اضيف مية فى الاخر

ودى صورة لاحلى طبق جمبرى ممكن تعمليه

انا قدمته مع رز ابيض

الف هنا وعافية

هيفولا