[هيفولا]

كيك الجزر

دى طريقة شيف نرمين هنو
انا اخدتها منها لما عملتها فى الموسم الأول من البرنامج بتاعها
و دى خلاصة تجاربى مع كل ملاحظاتى على الكيك ده

المقادير :


2 كوب سكر
كوب زيت او زبدة اللى تفضليه
3 بيضات
معلقة صغيرة فانيليا
2 كوب دقيق
معلقة صغيرة قرفة
رشة جوزة الطيب
رشة ملح
2 معلقة صغيرة بيكينج باودر
3 اكواب جزر مبشور
جوز بيكان
و دى صورته للى سألونى عليه



الطريقة :
هنضرب الزيت او الزبدة مع السكر
( لو استخدمتى زيت زى الصورة كده هتلاقى القوام صعب شوية
ضربه بالمضرب اليدوى و حتى المضرب الكهربائى مش هيخلّى الحبيبات
بتاعت السكر تدوب فا الزبدة بتكون افضل بس للأسف المرة دى كنت عاملاها بالزيت )
بس القوام ده هيتغير خالص بعد اضافة البيض
شوفى معايا القوام كده



و بعدين نضيف البيض واحدة ورا التانية
و نضرب كويس جدا بعد كل اضافة
هنا مع اضافة اول بيضة


تانى بيضة


تالت بيضة



هتلاقى القوام اتغير تماما زى ما انت شايفة كده
و السكر بقى مختلط كويس
ضيفى الفانيليا



هنخلط بقى الدقيق مع القرفة مع جوزة الطيب و الملح
و البيكنج باودر و نقلبهم بالراحة
و خدى بالك تنخلى كل المكونات دى قبل ما تقلبيها ( دى اول ملحوظة )


و تقلبيها بالراحة برضه اوعى تنسى
و بعدين تضيفيها على خليط البيض



و خدى بال قلبيا بالراحة مع البيض يعنى على ابطأ سرعة فى المضرب الكهربائى
او بالمضرب اليدوى
هنا شكلهم ما اختلط الدقيق مع البيض كويس



و بعدين ضيفى الجزر



و نقلب كويس بالمضرب اليدوى
او بالمعلقة لحد ما الخليط يبقى كده
بلاش المضرب الكربا عشان الجزر مايتكسرش



نكسر الجوز او نجرشه و نضيفه



و نخلطه و نحطه فى صينيه
انا هنا حطيت ورق زبدة فى الصينية لانى كنت ناوية ازين الكيك
لو انتى مش هاتزينيها يبقى رشى الصينية بزيت و دقيق بس



و دخليها الفرن على 180 درجة لمدة نص ساعة
و دى بعد ما طلعت من الفرن



ورق الزبدة مخلى شكلها من الجوانب مش اوى بس انا قلت لكم
انا ناوية ازوقهها فا كل ده مش هايبان ان شاء الله
المهم قبل ما تزينيها تسيبيها تبرد كويس اوى
و ياريت تحطيها فى التلاجة بعد ما تبرد و تغلفيها بورق شفاف على الاقل ساعتين
عشان تعرفى تقسميها و تتعاملى معاها من غير خساير

الأول قلت هاقسمها و احط جواها
كريم تشيز بسيط
ودى كانت مكوناته
علبه جبنة كريم 150 جرام



هنضربها بالمضرب عشان تبقى ملساء و مفيش فيها تكتلات
و بعدين نضيف معلقة صغيرة فانيليا


و بعدين كاس و نص سكر بودرة ( ضيفيهم بالتدريج )



و كده الكريم تشيز البسيطة جهزت

قسمت الكيك نصين ( ممكن تقسميه تلاته لو تحبى )

و ضيفت 3/4 الكريمة بتاعتى فى النص
بس ماوصلتوش للأطراف
لانى لما احط الطبقة اللى فوق هتضغط عليها و تخليها توصل للأطراف

و حطيت نص الكيك التانى

و الربع الباقى من الكريمة حطيته عليها و على الأطراف
( مجرد مسحة بسيطة عشان العجينة بتاعت اللوز تمسك كويس فى الكيك )
و فردت عجينة اللوز او المازيبان و حطيتها على الكيك كده

و ظبطت الجوانب و قطعت الزيادة من العجينة

و عملت الجزر و البتاع الأخضر بتاعها ده
و بليته بنقطة ماية على طرف صوابعى
و لزقته على عجينة اللوز من فوق
و ده كان الشكل النهائى

هنا من الجنب

و دى لما قطعتها

عندى شوية ملاحظات يا قمرات

اولا زى ما قلت لكم لازم لازم تضربى البيض كويس
بعد كل اضافة سواء ضيفتى زيت او زبدة
بس عادة لو ضيفتى زبدة لما بتضربيه مع السكر القوام بيبقى أملس
انما فى حالة الزيت المضرب مش بيعمل نتيجة حلوة زى العجانة

فى حالة انك بتستخدمى الزيت ممكن تضربى السكر و الفانيليا و البيض
و بعدين تضيفى عليهم الزيت بعد ماتضربيهم كويس
بتدى نتيجة تحفة برضه
خصوصا لو هتعمليه كب كيك مش كيك كبير
انما لو بتستخدمى الزبدة يبقى امشى على نفس الخطوات عادى
سواء كيك كبير او كب كيك

زى ما قلت لكم
مش مهم تضيفى ورق الزبدة
المهم تدهنى الصينية بزيت خفيف و ترشى شوية دقيق
ورق الزبدة مهمتهه هنا كانت انها ماتخليش
اى طرف ناشف عشان التزيين بعجينة اللوز

ممكن تستغنى عن الجوز بيكان خالص
او تستبدليه بعين الجمل عادى برضه

فيه ناس بتحب تضيف كاكاو بودرة
لو بتحبى ضيفى معلقة

بالنسبة للجزر اللى زينت بيه الكيك للأسف انا مجاش فى بالى خالص أصوره
بس هوه طريقته سهلة جدا
الباقى من عجينة الفرد بتاعتى قسمتها جزئين وحد لونه بالورانج
و التانى بالأخضر و شكلتهم بايدى و بسكينة فتحت فتحة صغيرة للجزء الأخضر
و شكلته و حطيته جوه الفتحة اللى عملتها فى الجزرة
و جبت سكينة مش حامية و عملت خطوط على الجزرة
عشان تبقى شبه الجزرة العادية

يارب تكون وصفتى الناردة عجبتكم
و اى استفسار انا فى الخمة ان شاء الله

لو عجبتكم الوصفة بس ادعولى بظههر الغيب

فى أمان الله يا قمرات


نقلته لكم
هيفولا