الطريقه والمقادير مع بعض
الطبقه الأولى - اللي تحت -
16 حبة أوريو مطحونه - بدون الكريمه -
+ نص اصبع زبده تقريبا - أو اقل شوي -
نفركهم في بعض ونصفهم بالصينية حقت التشيز كيك
ونضغط عليه عشان يتماسك شوي .
وبعدين نغلف الصينيه من برا بقصدير
- عشان بنسوي حمام مائي للتشيز كيك
ومانبي الماي يدخل ويحوسها -
الحين نسوي الطبقه الثانيه :
بالخلاط اليدوي نخفق :
12 حبة جبن كيري + علبة زبادي لين يتجانسون .
ثم نضيف عليهم حبتين كبار بيض ورشة فانيلا ونخفق - شوي شوي -
وبعدين نضيف عليهم 3 ملاعق كبيره جاناش الشوكولاته
- اللي هو كريمة خفق مع كاكاو خام مذوبين -
+ ثلاثة ارباع كاس سكر -
ممكن تخلينها كاس كامل ان كنت تحبينها تكون حالية شوي -
+ 3 ملاعق كبيره بودرة كاكاو .
ونخفقهم شوي شوي لما يتجانسون .
الحين نصبهم شوي شوي ع طبقة الأوريو
ونحط هالصينيه في صينية أكبر منها وفيها ماي دافي
وندخلها الفرن ع حرارة 350 ..
ممكن تاخذ ساعه الا ربع وممكن اقل وممكن أكثر .
المهم ان لما نحط اصبعنا بالوسط على خفيف نلاقيها ثابته .
الحين لا استوت نسكر الفرن ونخليها تطبخ داخله لما يبرد الفرن .
عشان لما نطلعها برا ماتتشق علينا من فوق بسبب اختلاف درجة الحرارة فجأه .
عقب مانطلعها نخليها تبرد شوي ونصب عليها طبقة من جاناش الشوكولاته .
و ع الثلاجه ..
الأفضل تقعد يوم كامل لما تتماسك .
ولما نجي نقطعها نغمس السكينه بماي دافي شوي عشان تنقطع مضبوط
ونزينها ونقدمها .
هيفولا