من:الأخت الزميلة / أمانى صلاح الدين
علشان بحبك
بقلم / أمانى صلاح الدين

لأ حأقول .. وافضل اوجه وانصحك
علشان بحبك
علشان بحبك قبل ما اشوفك والمحك

علشان انتى انا وانا انتى
مش انتى بنتى ؟؟!
يعنى روحى على الأرض ماشية
يعنى فى عينى صغيرة مهما كبرتى
يعنى لما كلمة حلوة تتقال عليكى اتبسط
وافرح واقول دى قطتى
انتى بذرة راعتها واديتها حقها
وبتصرفاتى واخلاقى وجهتها
علمتها ترجع لديننا وتلتزم
علشان فى يوم ما يسألنى ربى عنها
حقوله ربيتها وعلمتها
حقوله ربيتها يوم برى بأمى
ربيتها يوم ما شافت حبى لها
وحاضر يا امى وكله تمام
وبعد كلامها مفيش كلام

لأ حأقول .. وافضل اوجه وانصحك
علشان بحبك
علشان بحبك قبل ما اشوفك والمحك

انا مش عسكرى ادى اوامر واجبة
او اأمرك اوامر شاقة ومتعبة
انا ام نفسها تشوف بنتها
احسن بنات الكون وحتى احسن منها
لو يوم حسيتى بقسوتى بصى فى عيونى
حتلاقى صورتك ساكنة ما بين جفونى
ولو يوم زعلت قلبى يطلعنى عيلة
واما داريت ضحكتى
فضحتنى ضحكة طويلة مجلجلة
شوفى يا بنتى أنا وابوكى مكسبك
واغلى من كنوز الأرض ولا غيرنا يوم حيكسبك

لأ حأقول .. وافضل اوجه وانصحك
علشان بحبك
علشان بحبك قبل ما اشوفك والمحك